MOI: 20 Sanuali 2023 - 'Oku toe hokohoko atu 'a e ngaue ki hono langa 'o e 'u Fale Tokoni he Poloseki Hunga Tonga Hunga Ha'apai (HTHH) kiate kinautolu ne matu'utamaki he faingata'a 'o Sanuali 2022.
Ko e fale fakakatoa 'e 26 mei Sopu ki Patangata. Ko e fale 'e 7 'i Sopu, 8 'i Kolomotu'a pea 11 'i Patangata.
Ko e sipinga 'o e 'u fale ni 'oku fungavaka kotoa. Kuo 'iai e 'u fale kuo 'osi pea ni'ihi 'oku faka'osi'osi ka kuo nofo'i, lahi tahaa 'oku hokohoko atu e langa. Ko e 'u fale si'isi'i pe 'oku te'eki ke kamata hono langa ka kuopau pe ke langa. Neongo na'e 'iai 'a e ngaahi fale ne kei fai hono alea'i 'i he me'a fakakelekele ka kuo maau e tokolahi taha.
Ko e 'u fale 'eni mei he 'u fale tokoni kotoa 'e 286 'oku tala'ofa 'e he Pule'anga lolotonga ke nau langa. Kuo 'osi maau mo huufi e 'u fale nofo'anga 'i 'Atataa Si'i he ta'u kuo'osi, pea ko e hokohoko atu 'eni e ngaue.
'I he taimi tatau kuo'osi 'i he 'Otu Mu'omu'a, Ha'apai 'a e 'u konga lahi e koloa langa kiate kinautolu. 'E kamata he uike kaha'u 'a e ngaue atu ki he 'Otu Mu'omu'a ke fakahoko 'a 'enau 'u langa fale HTHH.
'Oku tataki e ngaue ni 'e he Potungaue Ngaahi Ngaue Lalahi mo fakapa'anga 'e he Pule'anga lolotonga.