MOI: 16 Sanuali 2023 - Kuo tau e langi 'o e kainga 'o Pilinisi Ata 'i 'Atataa Si'i 'i hono faka'ilonga'i 'a e ta'u 'e taha 'o e pa e mo'ungaafi ko Hunga Tonga Hunga Ha'apai mo e peaukula 'o keina e nofo 'a e kainga e nofo'anga 'o 'Atataa. Ne nau tukuhausia ka kuo nau ta'imalie he nofo'anga mo e kelekele ne foaki 'e Pilinisi Ata 'i Masilamea.
Na'e fokotu'utu'u ai 'e he Minisita 'o e Potungaue Ngaahi Ngaue Lalahi, Hon.Sevenitini Toumoua mo e kainga 'o 'Atataa Si'i e 'aho lotu mo fakafeta'i ke faka'ilonga'i'aki 'a e kakato e ta'u taha 'o e Tsunami ne hakee.
Ko e efiafi na'e fakamafana mo ta'e'amenekina 'a hono ualolo 'e he kainga 'o e Vahenga Hihifo 'a e ki'i kolo ni. Na'e fakalangilangi ai 'a e Palemia Le'ole'o, Hon Samiu Vaipulu. Na'e me'a ai 'a e Palesiteni 'o e SUTT, Rev Dr.Tevita Havea mo hono hoa, pea pehe ki he Sekelitali, Rev Dr. Feleti 'Atiola, kau Faifekau 'o e Vahenga SUTT 'o Hihifo mo e kau Minisita.
'I he me'a 'a e Palesiteni, na'a ne fakaha fiefia 'a e mahino ko ia 'e fai 'a e polotu ke kamata'i'aki 'a e nofo'i he kolo ni. Na'e fakahua 'a e Palesiteni ke 'iai ha falelotu ma'a e kainga ni. Ko e kamata'anga 'eni 'a e lotu mo 'ata ki he ngaahi feohi'anga lotu ke nau ngaue mo honau kau memipa ki he'enau lotu, 'o 'ikai ko e SUTT pe kae kau ai mo e ngaahi siasi kehe.
'I he fakamalo'ia 'e he Minisita 'o e Potungaue ni, Hon Sevenitini Toumoua e lava lelei 'a e polokalama ni mo hono kau hiva 'e 6 ne nau kau ki aii. Na'e tala'ofa 'a e Minisita ki he kainga ni 'e langa 'a honau falelotu mo e holo.
