MOI: 8 Ma’asi 2023 - Lolotonga ‘a e ‘i Tonga ni ‘a e kau Fakafofonga ‘o King Salman ‘o e Saute ‘Alepea, ne nau fakataufolofola ai ki he Ta’ahine Kuini, Nanasipau’u Tuku’aho fakataha mo ‘enau foaki ‘enau tokoni ko e USD$250,000.00 ki he ngaue tokoni’ofa ‘a e Ta’ahine Kuini. Ko e tokoni ‘a e Ta’ahine Kuini kiate kinautolu ne nau laveatamaki ‘i he Peaukula ‘o Sanuali 2021.
Kaekehe ko e kau tangata ‘e toko 3 ne nau ‘a’ahi mai makatu’unga mei he alea fakatipilometika ‘a e Ta’ahine Pilinisesi Latupuipeka Tuku’aho ‘i hono fatongia Talafekau Lahi ma’a Tonga ‘i ‘Aositelelia mo e Talafekau Lahi Saute ‘Alepea.
Ko e kau ‘a’ahi ni na’e taki mai ai ‘a Mr Faleh Abdullah Alsubaie - Fakafofonga ‘o e King Salman Humanitarian Aid and Relief Centre, Mr Mohannad Ahmed Alhefdi - Assistant Head of Economic and Cultural Department of the Royal Embassy ‘o Saudi Arabia ‘i Canberra mo Mr Abdulmalik Abdulaziz Alkhalifah mei he The King Salman Humanitarian Aid and Relief Centre.
‘I he ‘aho ni ne ‘ahia ai ‘e he kau folau ni ‘a e kolo ko ‘Atataa Si’i ‘o talitali mafana ‘e he CEO ‘o e Potungaue Ngaahi Ngaue Lalahi, Lopeti Heimuli pea pehe ki he Pule ‘o e Poloseki Hunga Tonga Huga Ha’apai, Paula Kava. Na’e fakamatala lelei ‘e he CEO e Potungaue ki he kau folau ni e tukunga mo e ngaue ne fai ki he ki’i kolo fo’ou ni. Ko e fakafiefia taha ko ‘enau lava ke nau ‘ahia ‘o mamata tonu he ngaahi loto fale ‘o e ngaahi fale ne toki langa.
‘Oku foki atu e kau folau ni Tu’apulelulu 9 ‘o Ma’asi ni.