ONGOONGO TUKUATU
4 ‘Aokosi 2022: FUOFUA FAKATAHA ‘A E ‘EIKI MINISITA ‘O E POTUNGAUE MO E SEKELITALI SENIALE ‘O E KAUTAHA FAKAMAMANI LAHI KI HE FEFOLAU’AKI VAKAPUNA SIVILE.
'Eiki Minisita 'o e Potungaue, Hon. Sevenitini Toumoua pea mo e Talekita Le’ole’o ‘o e Va’a Fefolau’aki Vakapuna Sivile ‘a e Potungaue ‘i he fakataha mo e Sekelitalii Seniale ‘o e Kautaha Fakamamani Lahi ki he Fefolau’aki Vakapuna Sivile.
Na’e fakahoko ‘i he pongipongi Pulelulu 3 ‘o ‘Aokosi ni ‘a e fuofua fakataha ‘a e Sekelitali Seniale ‘o e ICAO (International Civil Aviation Organisation, Mr. Juan Carlos Salazar mo e ‘Eiki Minisita ‘o e Potungaue Ngaahi Ngaue Lalahi, Hon. Sevenitini Toumo’ua. Ko e fakataha mahu’inga ‘eni ‘o ‘ikai ngata pe ‘i he’ena fuofua fe’iloaki ka ko e fakamalohia aipe mo kei fakapapau’i ai ‘a e va fengaue’aki ‘o e Pule’anga Tonga mo e Kautaha Fakamamani lahi ki he Fefononga’aki Vakapuna Sivile (ICAO), ‘i he fetalite’aki ki he malu mo e hao ‘o e ngaahi fefolau’aki vakapuna fakavaha’a pule’anga.
Na’e kau fakataha ‘a e ‘Eiki Minisita, Hon Sevenitini Toumo’ua mo e Talekita Le’ole’o ‘o e Va’a ‘oku nau tokangaekina ‘a e Fefolau’aki Vakapuna Sivile ‘o e Potungaue, Emeline Fifita ‘i he fakataha zoom ko ‘eni.
Ko e ICAO ‘oku nau pule’i mo fatu e ngaahi tu’utu’uni ‘i he fefolau’aki vakapuna Sivile fakavaha’apule’anga ‘a ia ‘oku pau ke muimui ki ai ‘a e ngaahi mala’e vakapuna ‘i he ngaahi fonua lahi pea ‘ata ki mamani ke fefolau’aki mo tu’apule’anga. ‘Oku nau toe ma’u ‘a e mafai lahi taha ki hono tapuni ha mala’e vakapuna ‘o kapau ‘e ‘ikai ke nau a’u ki he tu’unga taau mo e tu’utu’uni ‘a e ICAO.
‘E fakahoko ‘i Sepitema ‘a e fakataha ‘a e ICAO ‘i Kanata, ko e fakapapau’i ai pe ‘a e ngaahi tu’utu’uni ‘oku ngaue’aki mo fakaloloto e ngaahi va fengaue’aki ‘i he malu ‘a e fefolau’aki. Ko e ICAO ‘oku fatu’aki ia ‘a e Kosilio ‘o memipa ai ‘a e ngaahi fonua ‘e 36, ‘oku fili fakata’u tolu ‘a e Kosilio ko eni. Ko e ‘ulu’i ‘ofisi ‘o e ICAO ‘oku ‘i Quartier International of Montreal, Quebec, Kanata..
NGATA’ANGA.
Issued by: MINISTRY OF INFRASTRUCTURE, 'Alaivahamama'o Bypass Road, Fanga 'o Pilolevu, Tonga.
Tel: +676 7401500, Fax. +676 25440 email: